اعـذريني لا كفرته الغـــرام اللي تبين ---
--- ايه كافر والله كافر بالخـيانه والخـداع
ما هو كيفك لو قبلتي او رفضتي تعذرين ---
--- انكشف زيف المحبة واختفى ذاك القناع
ايه مقبل لا لا مقبل مره غيمه ومره طين ---
--- من يعانق غيم حبه كيف يرضى ذل قاع
والغريب ان البدايه مثل منتي تعرفين ---
--- يومه أقبل قلبك اللي قال انا كلي ضياع
احتويتك بالمعاني لجل ألململك سنين ---
--- وانتشل منك الجروح اللي تصورك انطباع
مرت الأيام عدت وانتفى ذاك الآنين ---
--- كل حزنك في وجودي اليوم ما له اي داع
من حنيني ما عطيتك الا لجل تسافرين ---
--- من مطار الدمعه يللي في عيون الجرح شاع
ما نويت اقبل مقابل في دروسي تسلمين ---
--- كان عطفي لجل عطفي ما نويت الانتفاع
قلتي لا ما هو غريبه منّك أنته يالعوين ---
--- كم احاول ما احبك تبقى لي نور وشعاع
والهوى ينزع بقلبي وأغصبه يبقى سجين ---
--- لين عيا يحتملني ينزع القلب انتزاع
قلت مرحب بالخفوق اللي تصورته ظنين ---
--- من كثر ماني رعيته صرت كني عنه راع
يا هلا بك يا هلا بك عد ما فيني حنين ---
--- للهوى اللي قد بنيته في سهول الإمتناع
سارت الآمال سارت والهوى تحفظه عين ---
--- لين بدلت المعاني وكل ما في القلب ضاع
اختزلت الهم فيني وارتويت اشرب آنين ---
--- واحجز الاقدار وارحل عن حدودك للوداع
لين أرسلتي قناعك تسألي وين أنت وين ---
--- جاك ردي في بساط الشعر بْهجوم ودفاع
ما نسيتك ما نسيتك وانا أظنك تذكرين ---
--- لما برهنتي اشتياقك جيت انا كلي انصياع
منكر اللحظات يللي كنا فيها مغرمين ---
--- من عطايانا المحبه كل يومن في ارتفاع
غير طبعك ذاك طبعك عاد مثل اول يشين ---
--- عانك الله رغم جرحي لا تِعْودْ للضياع
نلتقي في بحر ذكرى او بحلم الياسمين ---
--- وان تلاقينا كأنا في زمن مبيوع وباع
احضني طرفي بعينك واطرفي دمعه بعين ---
--- وان تهيج موج دمعي ارفع بقلبك شراع
اعتذر لي قول آسف لا تقبلها اليدين ---
--- واركب الذكرى وسافر عكس تيار الطباع
واذكريني في كتابك في دواوين السنين ---
--- ما خدعتك يوم لكن ما تحملت الخداع
/
/
علي آل زين
ليست هناك تعليقات:
إرسال تعليق